ڕێبوارانی ڕێگای حه‌ق هه‌میشه‌ كه‌مینه‌بوون
سەردان : ١٥
بەروار : ٢٠١٩/١٠/٠٢



ڕێبوارانی ڕێگای حه‌ق هه‌میشه‌ كه‌مینه‌بوون ئیتر تۆیش دڵ ته‌نگ مه‌به‌ و كۆڵ مه‌ده‌

قال سيد التابعين أويس القرني رحمه الله :

( إن قيام المؤمن بأمر الله لم يُبقِ له صديقا ،والله إنا لنأمرهم بالمعروف وننهاهم عن المنكر فيتخذونا أعداء ،ويجدون على ذلك من الفساق أعوانا ،حتى والله لقد رموني بالعظائم ؛وأيم الله لا يمنعني ذلك أن أقوم لله بالحق ) الطبقات الكبرى : (6/164).

گه‌وره‌ی تابیعین ئووه‌یس ـ وه‌یسی ـ قه‌ره‌نی فه‌رموویه‌تی:
به‌ڕاستی به‌جێ گه‌یاندنی فه‌رمانه‌كانی په‌روه‌ردگار له‌لایه‌ن بڕواداره‌وه‌ هاوڕێی بۆ ناهێڵێته‌وه‌،سوێند به‌ خوای گه‌وره‌ ئێمه‌ فه‌رمانیان پێده‌كه‌ین به‌ چاكه‌ وه‌ ڕێگریان لێ ده‌كه‌ین له‌ خراپه‌ ،كه‌چی ئێمه‌ به‌ دوژمن ده‌زانن وه‌ مرۆڤه‌ فاسقه‌كانمان لێ هان ده‌ده‌ن ،هه‌تا كار گه‌یشتووه‌ته‌ ئه‌وه‌ی كه‌ تاوانی گه‌وره‌یان داوه‌ته‌ پاڵم ،به‌ڵام سوێند بێت به‌ په‌روه‌ردگار ئه‌مانه‌ هیچی نام گێڕێته‌وه‌ له‌ ووتنی حه‌ق له‌به‌ر خوای گه‌وره‌ .
چه‌ند سودێك:

1ـ كاتێك مرۆڤی بڕوادار هه‌ڵده‌ستێ به‌ فه‌رمان كردن به‌ چاكه‌ و قه‌ده‌غه‌ كردنی خراپه‌ و ڕوونكردنه‌وه‌ی حاڵی بیدعه‌كاران و گومڕایان له‌ باتی ئه‌وه‌ی به‌ خۆیاندا بچنه‌وه‌ و چیتر خه‌ڵكانی دڵساف فریو نه‌ده‌ن وبگه‌ڕێنه‌وه‌ بۆ لای په‌روه‌ردگار،كه‌چی زیاتر جه‌سوور ده‌بن له‌ بڵاو كردنه‌وه‌ی گومڕایی و به‌لاڕێدا بردنی خه‌ڵكانی ساویلكه‌ و نه‌زان،ئه‌مه‌یش سونه‌تی بیدعه‌كارانی سه‌رده‌می تابیعینه‌.
2ـ ئه‌گه‌ر له‌سه‌رده‌می تابیعندا فه‌رمان كردن به‌چاكه‌ و قه‌ده‌غه‌كردنی خراپه‌ ئه‌مه‌ی لێ كه‌وتبێته‌وه‌،ئه‌بێ له‌م سه‌رده‌مه‌دا چاوه‌ڕێی چی بكرێت له‌وانه‌ی كه‌ به‌رداشی ئاشیان له‌سه‌ر نه‌زانی خه‌ڵك ده‌سوڕێته‌وه‌؟.
3ـ به‌درێژای مێژوو هه‌میشه‌ ڕێبوارانی ڕێگای حه‌ق كه‌مینه‌بوون وه‌ك په‌روه‌ردگار فه‌رموویه‌تی: ((وقلیل من عبادی الشكور)) كه‌واته‌: دڵگران مه‌به‌ به‌كه‌می ڕێبوارانی ڕێگای حه‌ق و زۆری ڕێگران و بازرگانه‌كانی سه‌ر ئه‌و ڕێگایه‌.
4ـ له‌گه‌ڵ ئه‌و حه‌قیقه‌ته‌ تاڵه‌ی كه‌ باسمان كرد ....... نابێت بانگخوازانی ڕێگای حه‌ق سارد ببنه‌وه‌ و كۆڵ بده‌ن له‌ گه‌یاندنی ڕێبازی ڕاستی رسول الله صلی الله علیه‌ وسلم 
و یارانی ،چونكه‌ ئه‌مه‌ جه‌نگێكه‌ له‌ نێوان حه‌ق و به‌تاڵدا له‌ مێژووی درووست بوونی باوكه‌ ئاده‌مه‌وه‌ هه‌ڵگیرساوه‌ و مه‌حاڵه‌ كوژاندنه‌وه‌ی هه‌تا ڕۆژی دوای. خوای په‌روه‌ردگار له‌ شوێن كه‌وتنی شه‌یتان و هه‌وا و نه‌فس بمان پارێزێت.

وصلی الله وسلم علی نبینا محمد وعلی اله وصحبه اجمعین.
محسن محمود سلیمان 
1 / 2 / 1441ك.......30 / 9 / 2019 م